BAGUIO CITY–KINUMPIRMAR ti maysa nga operator ti van ditoy lokalidad a nangipangatoda iti dua a pisos a plete iti tunggal kilometro a paturong sadiay lowland wenno pasang-at ditoy siudad ti Baguio.
Iti panakipatang ti Bombo Radyo kenni Reynaldo Bacoco, maysa nga operator ken presidente ti UV Express, kinunana a nabayen nga ada ti pammilin manipud iti LTFRB para iti panakaiyemplementar ti panakaipangato ti plete kadagiti van.
Kinunana nga idi pay laeng 2007 ti nasao a pammilin ngem saanda daytoy a sinursurot ngem idi ada ti naangay a seminar dagitoy iti LTFRB ket naipakaammo kadakuada a nasken a masurot daytoy gaputa dagitoy met ti mamulta iti kanito a saanda daytoy nga iyemplementar.
Kinunana a sakbayda met nga inyemplementar ti pammilin ti LTFRB ket nangipaayda pay iti pakdaar kadagiti pasahero dua a lawas sakbayda daytoy nga inyemplementar.
Kabayatanna, kinunana a nasken a dagitoy ti makigtot kalpasan a kinuna ni DOTr- Cordillera Assistant Regional Directore Mohammad Nasser Abbas a saanna nga ammo nga ada ti panagngato iti plete kadagiti lugan.
Gapu iti daytoy, kinuna ni Bacoco a dagitoy ti opisyal ti gobyerno isut gapuna a nasken nga ammoda dagiti linteg.
Maipalagip nga immunan a kinuna ni Abbas nga awan ti petisyon nga inaprobaran dagitoy ken ti DOTr- Region 1.
Inlawlawagna a sakbay a maipangto ti plete kadagiti lugan nga agturturong iti dua a lugar ket nasken nga aprobaran pay daytoy ti board ti DOTr.
