Maysa a karit iti Commission on Elections(COMELEC) ti panangallukoy kadagiti botante nga agparehistro para iti 2025 National and Local Elections nangruna ta nairuam dagiti daduma a kumamkamakam iti last minute.
Iti panakiuman ti Bombo Radyo kenni Jeffrey Rubino, election officer ti Commission on Elections(COMELEC)-Sablan, ad-adda a bimmaba ti bilang dagiti agpaparehistro iti opisina dagitoy para iti nasao nga eleksyon rason a mangipatpatungpaldan ti satellite registration nu sadino, dagituyen ti dumandanun kadagiti babarangay iti nasao a munisipalidad.
Sigun kenni Rubino, kalkalpas laeng ti panangipinalda iti election registration board kadagiti registration, transfer, correction, reactivation, ken deactivation kadagiti botante iti database dagitoy.
Maibasar iti datus ti nasao nga opisina, dumanun iti nasurok pito gasut(700) ti bilang dagiti saan a nakapagbotos ti mamindua a daras iti nasao a munisipalidad .
Kabayatanna, dinakamat ti nasao nga opisyal nga agleppas ti voter registration inton ngudo ti Setyembre ti agdama a tawen rason a maguyguyugoy dagiti botante nga agparehistro iti nasapsapa tapno maliklikan ti atiddog a pila inton umadanin ti deadline daytoy.//Bombo Rob Dominguez
