Manamnama nga agtultuloy ti panagprotesta dagiti estudyante sadiay Estados Unidos gapu pay laeng iti kiddawda a panagsardeng ti giyera iti nagbaetan ti pagilian nga Israel ken Palestine.
Iti panakiuman ti Bombo Radyo kenni Aldrin Dela Cruz, Bombo International News Correspondent manipud St. Augustine, Florida, United States, kinunana a dagiti estudyante sadiay Amerika ket talaga nga aktibo kadagiti nagduduma a pakaseknan iti sangalubongan a pakairamanan ti giyera iti Israel ken Palestine.
Sigun kenni Dela Cruz, adda payen a gapu iti panagprotestada ket daduma kadagiti estudyante ket agaramidda iti tent iti ruar ti pagadalan tapno maipeksada ti kapanunotanda.
Kangrunaan met a mapaspasamak ti panagprotesta sadiay Texas, Florida, Boston, California ken daduma pay a paset ti Estados Unidos.
No pay kasta, kadagiti maipatpatungpal a protesta sadiay Amerika, kanayun met a nakaalerto dagiti otoridad no sadino nakadeploy dagiti pulis iti pagadalan rason no apay nga awan ti insidente ti panakadangran a mailislista rason no apay a natalged dagiti panagprotesta dagitoy.
Innayon ni Dela Cruz a silulukat met ti gobyerno ti Estados Unidos kadagiti protesta la ketdi awan ti linteg a malablabsing dagitoy.//M
