Agarup uppat a gasut nga indibidual ti nakipaset iti naisayangkat a caravan idiay Dalicno, Itogon, Benguet ita nga aldaw.
Panggep ti aktibidad a tubngaren ken iyebkas dagiti maseknan ti karirikna da seknan iti mapangpanggep a panangpalawa pay iti panagminas iti nasao a lugar.
Nu sadino saan nga umanamong dagitoy iti nasao a plano.
Iti interview ti Bombo Radyo kenni Luciano Manuel, Presidente ti Dalicno Small Scale Miner Association, kinunana a posible a dakkel ti agbalin nga epekto ti expansion ti panagminas gapu ta maapektaran ti pagtataudan ti danum dagiti rinibribo a residente iti nasao a lugar.
Malaksid iti dayta, kinuna ni Manuel a maapektaran metlaeng ti panggedan dagiti small scale miners gapu ta minasen ti mangpangpanggep a kompanya ti pagtratrabahoanda.
Innayona nga adda ti naipatungpal a konsultasyon kadagiti residente ngem namingsan laeng daytoy ken saan a nangngegan ti kapanunotan dagitoy gapu ta napasamak a dagus ti negosasyon.
Kabayatanna, kinuna ni Manuel nga awan ti mapasamak a panagtubngar iti nasao a plano nu naikoordinar nga umno kadakuada.//Bombo Mera Pacpacan
