BAGUIO CITY- Nagballaag ti Department of Tourism (DOT-CAR) kadagiti maidiaydiaya kadagiti turista iti peke a panagbenga tour packages.
Sigun ken DOT CAR Regional Director Jovi Ganongan, adu dagiti maaw-awatda a reklamo manipod kadagiti turista mainaig kadagiti peke a tour packages a saan a nakarehistro iti nasao nga ahensya.
Inlawlawagna a nasken kuma a dumalan iti panagsukimat ti DOT wenno iti acreditation ti maysa a tour operators a mangidiaya ti tour packages tapno maipanamnama ti seguridad dagiti turista.
Innayunna pay a maysa a pakakitaan ti standard ti maysa nga tour operator a mangidiaydiaya kadagiti tour packages ti akreditasyon dagitoy.
Kagiddan iti daytoy, inwaragawagna kadagiti maseknan a mabalinda a kitaen dagiti listaan dagiti tour operators a nakarehistro iti DOT iti www.tourism.gov.ph.
Ginuyugoyna metlaeng dagitoy a saanda kuma a dagos nga agtalek kadagiti idiadiaya dagiti tour operators ken nasken a sukimaten dagitoy no lehitimo wenno saan.
