Mannarimaan nga adda ita iti kustodiya ti Department of Social Welfare and Development (DSWD) ti 13-anyos a Grade 8 student ti Lucban Integrated School iti Baguio City a nang-imet ti paltog iti uneg ti pagadalan idi Setiembre 16.
Sigun iti kapulisan, ti inaramat ti nasao nga estudyante ket maysa a Calibre .38 pistol. Nupay kasta, impettengda nga “unserviceable daytoy” ken saan a tagikua ti maysa a pulis.
Sigun kenni PCOL Nixon Laoyan, City Director ti Baguio City Police, mannariman ti beripikasyon dagitoy nu asino ti makintagikua iti nasao a paltog. Nupay kasta, kinana metlaeng nga addan ti Person of Interest (POIs).
Iti Press Conference nga impatungpal ti Lucban Integrated School ita nga aldaw, naibinsa-binsa dagiti napasamak iti nasao nga insidente.
Sigun kenni Felto Agpawa, School Head ti nasao a pagadalan, nakaawat daytoy iti report iti 12:40 ti pangaldaw babaen iti maysa a text message manipud iti maysa kadagiti nagannak nga adda ti maysa nga estudyante nga adda immetna a paltog.
Saannna metten a dinakamat ken imbinsa-binsa nu ayna pay dagiti dadduma a napasamak. Innayonna a saan daytoy a mangipaay iti kanayunan a komento seknan iti napasamak agingga maala amin a impormasyon seknan iti napasamak.
“Please allow me not to comment on that hanggat makumpleto ang makukuha naming information”, sigun kenni Agpawa.
Kabayatanna, dandani agalas-2 wenno 1:50 PM metten idi naawat ti kapulisan ti report manipud iti pagadalan a dagosda met a nirespondean.
Sigun iti pagadalan, naipaayen ti Psychological First Aid kadagiti naapektaran apaman a nagsublida iti pagadalan idi Setiembre 17. Nagtultuloy met ti panang-assessda kadakuada para iti kanayunan a psychosocial intervention.
Iti agdama, naireferren ti estudyante iti opisina ti DSWD para iti case management ken saan pay daytoy a nagsubli nga agadal bayat naiturnover metten iti Regional Forensic Unit ti paltog nga inaramat daytoy para iti umno nga imbestigasyon.
Mannarimaan metten ti nainget a koordinasyon ti kapulisan, pagadalan, ken City Social Welfare and Development (CSWDO) para iti imbestigasyon seknan iti nasao a kaso nangruna iti panangduktal nu kasano a naiyuneg ti paltog iti uneg ti pagadalan ken nu asino iti pudno a makinkukua iti daytoy.
Inlawlawag ni Agpawa a ti nasao a pagadalan ti maikadua a kadakkelan a pagadalan iti siudad nu sadino addaan daytoy iti agarup 2,399 a bilang dagiti estudyante.
Umap-apela met daytoy kadagiti Barangay Officials, parentes ken kapulisan iti panagtitinnulong tapno mamintinir ti seguridad kadagiti pagadalan.
Daytoy ket kasaruno metlaeng iti panangdakamatna nga agkurkurang ti guwardya iti nasao a pagadalan no sadino maymaysa laeng ti agserserbi kas guwardiya iti agsapa nupay tumultulong met ditoy ti night duty a guwardiya.
Kabayatanna, sigun met kenni Jerry Ymson, Education Program Supervisor, Division Public Assistance Center, posible a saan a nagkuri ti metal detector idi napasamak ti insidente.
Inlawlawag met ni PMaj Joshua Mateo, dadaulo ti Baguio City Police Station 2 a ti ama ti ubing ti timmulong tapnu mangkatungtung ti studyante tapnu masarakan ken maiturnover ti inaramatna a paltog.
Impeksa met ti kapulisan a sigun iti initial nga assessmentda, saanda pay a makuna nu adda ti security lapses ngem nagpallagip dagiti otoridad kadagiti firearm owners nga isecure da a nalaing dagiti paltog kadagiti lugar a saan a makita ken nalaka a maala dagiti ubbing.
Umap-apila metlaeng dagiti otoridad iti publiko iti panangliklik ti panangiwaras kadagiti unverified claims bayat a maimimbestigaran daytoy. //via Bombo Noveh Organo
