Ibalbalakad ti Bureau of Fire Protection-Benguet Provincial Office kadagiti umili nga agridam tapno saan dagitoy a mabiktima wenno madangran kadagiti palibang ken uram bayat ti isasangbay ti Paskua ken baro a tawen.
Iti panakiuman ti Bombo Radyo kenni Jesus D. Yango, Fire Chief Inspector iti Bureau of Fire Protection-Benguet Provincial Office, imbinglayna a mangipatpatungpal dagiti nagduduma nga opisina iti Bureau of Fire Protection-Benguet iti Oplan Paala: Iwas Paputok motorcade iti tunggal munsipyo iti nasao a probinsya.
Panggep ti nasao nga aktibidad a palagipan ti publiko maipapan kadagiti fire safety tips tapnu mailiklik ti panakabiktima dagitoy iti uram ken palibang.
Mainaig iti dayta, mangnamnama ni Yango a bantayan dagiti parentes dagiti annak dagitoy.
Nupay maipalubos ti panagaramat kadagiti paputok, impeksa ti opsiyal a nasaysayaat nu saanen nga itulok dagiti nagannak nga aramaten dagiti annakda dagitoy.
Malaksid iti dayta, inyunay-unayna iti publiko a sukimatenda a nalaing dagiti gatgatangen dagitoy nga dekuryente a christmas decorations.
Sigun kenkuana, nasaysayaat nu aggatang dagiti umili kadagiti christmas decorations nga addaan iti stickers manipod iti Department of Trade and Industry (DTI).
Mainaig iti dayta, impettengna a saan nga itulok nga agpatnag a maaramat dagiti dekuryente a christmas decorations gapu ta posible a makaitunda daytoy iti uram.//Bombo Genzel Depayso
