BAGUIO CITY – Binalakadan ti Northern Exotic and Wildlife Troopers (NEWT) ti publiko nga agridam kagiddan ti iruruar dagiti nagduduma a kita ti uleg kas iti king cobra iti probinsiya ti Benguet.
Iti interview ti Bombo Radyo kenni Bombo Radyo kenni Dr. Sean Frederick Serrano iti Northern Exotic and Wildlife Troopers, agsarak dagiti uleg iti mabalin a paglemmenganda wenno hiding spots kas kadagiti residential areas nu mapasaran ti panaglayos wenno mabasa dagiti daga a pagpagnaanda.
Dinakamat ni Serrano nga adda ti naimatangan dagiti residente a king cobra idiay Mankayan, Benguet itay laeng nabiit.
Nupay nagita dagiti kadawyan a maimatmatangan a cobra iti probinsiya ti Benguet, kinuna ni Serrano a delikado latta dagitoy nu adda ti makagatda gapu ta mangitunda iti ipupusay.
Gapu iti daytoy, impetteng ni Serrano a saan a gandaten a patayen wenno sagiden ti nadakamat a kita ti uleg gapu ta defensive dagitoy.
Sigun pay iti nasao nga opisyal, saan nga agresibo dagiti cobra la ketdi saanda a makarikna iti pangta iti aglawlawda.
Innayonna a nu makakita ti maysa nga indibidual iti king cobra wenno dadduma pay a kita ti uleg ket ipaayan wenno iyaramidan dagitoy iti pagnaanda tapno makaruarda wenno makapanawda.
Inyunay-unay metlaeng ni Serrano nga ireport a dagus kadakuada wenno kadagiti awtoridad nu makakita iti cobra gapu ta dagitoy ti makaammo iti umno a wagas nu kasano a tiliwen dagitoy.
Immuna metten a naimatangan dagiti king cobra ken python iti munisipyo ti Itogon, Sablan, Tuba, ken dadduma pay a forest areas.
