Imbinsa-binsa ni Councilor Rocky Aliping- ABC President iti siudad ti Baguio dagiti nagduduma a panagsagana dagiti nagduduma a barangay iti siudad ti Baguio ita a panawen ti panagtutudo.
Iti pannakiuman ti Bombo Radyo kenkuana, kinunana nga adun dagiti mitigating measures nga ar-aramiden dagitoy para ita a panagtutudo no sadino na-activate payen ti Brgy. Disaster Risk Reduction Management plan.
Malaksid iti dayta, kinunana pay a nalpasen a naimuntar dagiti screen a mangsagat kadagiti basura nangruna kadagiti kanal kas iti City Camp Lagoon.
Kitkitaen metlaeng dagitoy dagiti nagango a kayo ken dagiti sangsanga para ti emergency cutting tapno dagus a maikkat dagitoy.
Kabayatanna, innayon pay ti nasao nga opisyal nga agtultuloy ti panagmonitor dagitoy kadagiti nagduduma a babbarangay kasta metten ti information campaign tapno maliklikan ti panangibelleng iti basura kadagiti kanal.
