BAGUIO CITY – Naannayas ti panagsagana ti lokal a gobyerno ti Baguio para iti panakaisayankat ti COVID-19 vaccination program ti siudad.
Iti interview ti Bombo Radyo Baguio, kinuna ni City Administrator Engr. Bonifacio Dela Peña nga iti agdama ket dumanonen iti 42 ti nabukel a vaccination teams ti Baguio.
Nupay kasta, dinakamatna nga adayo paylaeng ti nasao a bilang no idilig iti nasurok 80 a vaccination teams a puntirya ti lokal a gobyerno.
Innayonna a maaddaan to iti trial wenno dry run ti COVID-19 vaccination program ti siudad.
Sigun pay kenni Engr. Dela Peña, naipaiman iti City Health Services Office ti dua a COVID-19 vaccine freezers a naidonar para Baguio a pakaidulinan dagiti bakuna a gatangen ken maited para iti siudad.
Dinakamatna a manarimaan metlaeng ti panagparehistro dagiti frontliners iti siudad a maipangruna iti panagbakuna kontra iti COVID-19.
