Agsagsaganan dagiti mannusuro ken ti metlaeng Commission on Elections-Benguet para iti panagsanay dagiti mannursuro nga agbalin kas electoral board para iti 2025 national ken local elections.
Iti interview ti Bombo Radyo kenni Atty. Elenita Julia Tabangin Capuyan, Provincial Election Supervisor 3 iti Commission on Elections-Benguet, kinunana a naituding a mangrugi ti panagsanay dagitoy iti maikatlo a lawas inton enero inton sumaruno a tawen kas panagsagana iti mapadmadaanan nga eleksyon.
Sigun kenkuana, kasapulan nga agsanay dagitoy agsipud ta baro manen ti maaramat nga automated counting machines ken kas pagalagadan metlaeng idi napalpalabas nga eleksyon.
Nupay kasta, kalpasan ti panagsanay dagitoy ket kasapulan metlaeng nga ag-exam mainaig iti panagaramat iti nasao a makina.
Ditoy a makita dagiti kwalipikado nga agbalin kas electoral board no nakapasa dagitoy iti nasao nga eksaminasyon.
Inlawlawag met ni Atty. Capuyan a dagiti mannursuro ti agbalbalin kas electoral boards tunggal eleksyon agsipud ta dagitoy ti addaan iti karbengan kas maitunos iti paglintegan ti Commission on Elections.
Kinunana nga immunan a nangipatulod iti surat ti nasao a komisyon iti opisina ti Department of Education seknan iti daytoy,ngem agkurang dagiti public teachers mabalin met dagiti private teachers kasta metten dagiti registered voters nga addaan iti good moral character.
Malaksid iti dayta, agbalbalin met dagiti pulis kas electoral board no adda dagiti areas of concern bayat ti eleksyon.
Kabayatanna, nagpalagip manen daytoy kadagiti agkandidato nga agbalin a nasirib ken basaen a nasayaat dagiti resolution a maaw-awat dagitoy tapno maliklikan ti pannakadiskualipikar.
