BAGUIO CITY – Tinagiragsak dagiti concessionaires iti biking area sadiay Burnham Park ti panakailukat manen ti turismo ti siudad ti Baguio kadagiti fully vaccinated a turista.
Iti panakiuman ti Bombo Radyo Baguio, imbinglay ni Analyn Oropesa, dadaulo dagiti bike concessionaires iti Burnham Park a nariknada ti panagngato ti bilang dagiti kustomer nga agturturong iti parke manipod naglukat ti turismo ken kabayatan ti panakalagip ti Aldaw dagiti Minatay nu idilig kadagiti napalpalabas a lawas a sumagmamano laeng dagiti agturturong sadiay.
Kinunana a nailistada ti killaat a panag-adu dagiti tao sadiay Burnham Park idi Domingo, Oktubre 31.
Sigun kenkuana, saan laeng a turista dagiti nagturong sadiay Burnham Park ngem adu met dagiti local a residente.
Gapu iti daytoy, impeksana ti panagyamanda iti lokal a gobierno ti Baguio gapu iti panakailukat ti turismo ti siudad tapnu makasubbot dagitoy kadagiti nagbalin a pukawda iti napalpalabas a lawas.
Iti baet daytoy, inaklon ni Oropeso a marigatanda a mangipatungpal iti minimum health standards iti panagado dagiti kostumerda gaputa adu latta dagiti saan nga agtulnog.
Nupay kasta, agtitinnulong dagiti concessionaires ti biking area iti panakapalagip ken panakabantay dagiti kustomer dagitoy tapnu masurot latta ti minimum health standards.
Sigun kenkuana, babaen iti daytoy ket saan a maiparikep ti biking area gapu iti panakalabsing dagiti pagalagadan kontra iti COVID-19.
Maipalagip a nasuspindir ti turismo ditoy siudad idi Setyembre gapu iti killaat a panagngato manen ti kaso ti COVID-19 iti lokalidad.
