Maapektaran dagiti development projects iti Department of Education nga aggatad iti agarop P4 billion iti panakaisara iti United States Agency for International Development(USAID)-maysa a dakkel nga humanitarian agency.
Sigun kenni Department of Education Assistant Secretary Roger Masapol, mabalin a maapektaran ti $94.02 million a basic education projects iti nasao a departamento a ponpondoan iti USAID pakairamanan iti Advancing Basic Education in the Philippines project, ti Opportunity 2.0 nga addaan iti pondo a $37.5 million, ti Gabay nga addaan iti $2.77 million, ti ILO PH nga addaan iti $5 million, ken ti Urban Connect nga addaan iti $1.25 million a pondo nga ipaay iti USAID.
Sigun kenni Masapol, ti panakasayang ti foreign assistance manipod iti USAID ket mabalin a makaapektar iti timeline dagiti proyekto ngem impanamnama daytoy nga ituloyda iti panagsarak iti pamuspusan para iti panakapondo dagiti nasao a proyekto.
Maipalagip nga itay laeng nabiit ket impakaammo ni Elon Musk a mai-shutdown ti United States Agency for International Development (USAID) nga immuna metten a binabalaw dagiti sumagmmano a kritiko ken inladawanda ti tignay nga unconstitutional.
