BAGUIO CITY – Agtultuloy nga ikamkampanya ti Mountain Province Police Provincial Office (PPO) ti panagsubli iti gobierno dagiti miyembro ken supporters ti komunista a rebelde a New People’s Army (NPA).
Iti panaki-uman ti Bombo Radyo Baguio, impannakkel ni PCol. Ruben Andiso, dadaulo ti pulisya iti Mountain Province a positibo ti agbalbalin nga epekto ti implementasyon ti Local Task Force to End Local Communist Armed Conflict a paset ti Whole of Nation Approach para iti maikalkalikagum a panakarmek ti insurhensia iti probinsia.
Sigun kenkuana, adu dagiti sigud a rebelde ti nagboluntaryo a makipaset iti Oath of Alliance dagitoy nga inorganisa ti pulisya tapno mapapigsa ti alyansa ti gobierno ken dagiti sibilyan kontra iti insurhensia.
Kinunana a pammaneknek a nalawlawagan dagitoy manipud iti dakes nga epekto ti naranggas a panagkontra iti gobierno ken naawisda iti pudno a benepisyo a maala manipud iti programa ti gobierno.
Innayona a silulukat latta ti gobierno a mangawat ken mang-akomodar kadagiti rebelde ken supporters ti NPA nga agtarigagay a maaddaan ti baro a panagbiag.
