BAGUIO CITY – Tarigagay ti lokal a gobierno ti Bokod, Benguet a mapagtalinaed ti enhanced community quarantine (ECQ) iti munisipio dagitoy uray kalpasan ti Mayo 15.
Iti pannakaipatang ti Bombo Radyo kenni Mayor Thomas Wales Jr., inlawlawagna a daytoy ket gapu ta agingga ita ket awan ti test kits iti munisipio.
Kinunana a saan a sigurado no adda wenno awan ti positibo a kaso ti COVID 19 sadiay gapu iti kinaawan iti test kits.
Innayonna a tartarigagayanda a mapagtalinaed ti ECQ sadiay tapno maipatungpal ti mass testing no adda ti maipaay kadakuada a test kits.
Nupay kasta, impanamnama ni Wales a nakasagana ti lokal a gobierno ti Bokod no maipatungpal ti general community quarantine (GCQ) kalpasan ti ECQ inton Mayo 15.
Kabayatanna, dinakamat ti mayor a siento porsienton a nalpas ti umuna a rikos ti distribusion ti tulong pinansial iti Social Amelioration Program sadiay Bokod ken nagnumar iti daytoy ti agarup 2,000 a pamilia.
Innayon ni Wales nga agsagsaganan ti lokal a gobierno ti Bokod para iti maikadua a rikos ti SAP.
