BAGUIO CITY – Isaksakad ti Department of Science and Technology (DOST) – Cordillera ti panaka-aramat ti baro a sistema a naawagan ti ‘Contact Tracing Automated Collection and Tracking System’ wenno ConTACTS.
Sigun kenni DOST-Cordillera Regional Director Nancy Bantog, manarimaan ti koordinasyonda kadagiti nagduduma a lokal a gobyerno iti rehiyon seknan iti panaka-aramat ti nasao a sistema.
Inlawlawagna nga iti nasao a sistema ket saanen a kasapulan nga aglista dagiti indibidual kadagiti logbooks wenno agusar ti QR code no adda ti transaksionda kadagiti pasdek.
Kinunana a daytoy ket gaputa iparehistroda laeng dagiti tattao ti mobile number dagitoy sakbayda nga umuneg iti establisyemento para iti nalaklaka a contact tracing.
Innayonna pay a maiwaras ti sistema iti nagduduma nga establisyemento para iti naan-anay nga implementasyon.
