BAGUIO CITY – Kidkiddawen dagiti vegetable traders kadagiti mangisaysayangkat iti quarantine checkpoint kontra iti COVID-19 iti panangilatang dagitoy iti naisina a linya para kadagiti lugan a naglaon ti nateng wenno taraon, dagiti agas ken basic commodities tapnu saan dagitoy a mainayon iti linya dagiti lugan a naglaon ti tattao.
Iti interview ti Bombo Radyo kenni Agot Balanoy, panakabagi ti liga dagiti asosasyon iti La Trinidad Vegetable Trading Post, kinunana nakitaripnongda kenni La Trinidad Mayor Romeo Salda tapnu ti laengen opisina daytoy ti mangited iti certification a dagiti nasao a trak ket naglaon ti natnateng ken nagtaud dagitoy iti trading post.
Sigun kenkuana, kiddaw dagiti vegetable truckers a no mabalin ket maipaayan dagitoy iti certification manipud iti Department of Agriculture tapnu saanen dagitoy a mairaman iti maipatpatungpal a checkpoint.
Nupay addan ti pammilin ti Department of Agriculture para iti saan a panakaladaw ti panakaibiahe dagiti nateng ket inaklon ni Balanoy nga adda latta dagiti truckers a madandanagan iti panakasinga ti panagbiahe dagitoiy.
Sigun pay kenkuana, marigatanda a maka-ala iti nasao a sertipikasyon manipud iti mismo a Department of Agriculture gaputa adda ti inlukat daytoy a food lane application.
Impeksa ni Balanoy a ti parikut iti panagaplikar iti food lane ket adu unay dagiti kasapulan a dokumento ken mabayag ti panakaiproseso ti foodlane accreditation.
Kwalipikado nga agaplikar para iti foodlane accreditation dagiti producers, manufacturers, traders ken importers ti taraon ken babaen iti daytoy ket mamintinir ti tuloy-tuloy ken saan a masingsinga a panakaideliver dagiti taraon ken dadduma nga agricultural commodities kagiddan ti nainget nga implementasyon ti enhanced community quarantine iti entero a Luzon.
Inlawlawag ni Balanoy a pagparparikutan ita dagiti vegetable truckers ti atiddog a pila kadagiti quarantine checkpoints nangruna sadiay Pangasinan.
Kinunana a gapu iti nasao a checkpoint ket maladladaw ti panagbiahe dagiti vegetable truckers nga agideliver ken agkarga ti nateng isut gapuna nga imbes nga alas singko ti malem a makasangpet iti trading post dagiti trak nga ag-angkat wenno agkarga ti nateng ket sumangpetta ita sadiay iti alas-dies agingga alas-onse ti rabii.
Innayonna a no met sumalog dagiti trak sadiay Metro Manila ket madanun met dagitoy ti truck ban isut gapuna a masitsitar dagitoy.
Nupay kasta, pagyamyamanan ni Balanoy ti panangikonsidera dagiti apprehending officers kadagiti nasao a truckers gapu iti mapaspasaran dagitoy a kriris.
