BAGUIO CITY – Imbilin ni National Security Adviser ken National Task Force to End Local Communist Armed Conflict (NTF-ELCAC) vice chairperson Hermogenes Esperon ti panangtututok ti Cordillera Regional Development Council (RDC) ken Cordillera Regional Peace and Order Council (RPOC) kadagiti pagkasapulan a programa para iti panakaileppas ti panagrebelde wenno insurhensiya ken kinakurapay ditoy rehiyon Cordillera.
Impeksana a babaen dagiti mabukel a programa ket naan-anay a magun-od ti Cordillera ti panagdur-as kas maysa a rehiyon babaen iti panakaipaay dagiti kangrunaan a social services kadagiti amin nga umili.
Kinunana a nasken a natibker ken kongkreto dagiti programa para kadagiti New People’s Army tapno maguyuguy dagitoy nga agsubli iti komunidad ken agbalin dagitoy a law-abiding citizens.
Innayonna pay a nasken a mangbukel ti Regional Task Force to End Local Communist Armed Conflict kadagiti programa para kadagiti nasusulinek a lugar iti Cordillera tapno saan a maguyugoy dagiti umili a kumappeng kadagiti rebelde. (with Bombo Brigitte Marcasi)
