BAGUIO CITY – Binallaagan ti Department of Agriculture dagiti aglaklako ti adulterated/unlabeled feeds wenno ti maaw- awagan ti “Pagpag Feeds” a mamulta ken maibalod dagitoy gaputa panaglabsing daytoy iti RA 1556 wenno ti Livestock and Poultry Feeds Act.
Iti interview ti Bombo Radyo, kinuna ni Jonathan Llanes, Information Officer 1 ti Special for Agricultural Development iti DA-Cordillera, adda ti naawatda a reklamo nga adda ti aglaklako ti 3rd class feeds sadiay Shilan, La Trinidad, Benguet partikular iti paset ti paglaklakoan ti chicken dung.
Gapu iti daytoy, nangipatungpal ti Provincial ken Municipal Agriculturist Office ti inspeksyon ken adda dagiti sumagmamano nga indibidual a nabagaan gapu iti panaglakoda iti daytoy.
Maibasar iti Information Education Campaign, naamoan nga agtataud dagiti pagpag feeds iti ruar ti Cordillera ken maisaysayang-at iti probinsiya ti Benguet.
Saan pay a kumpirmado nu maigidgiddan dagitoy a maibibiyahe kadagiti chicken dung tapno maiserrek iti probinsiya.
Kagiddan iti daytoy, binallaagan met ni Llanes dagiti agtartaraken ti baboy, manok ken aniaman nga ayup a saanda a gumatang ti adulterated feeds gaputa awan ti nilaon daytoy a nutrients nu di ket makadakkes laeng daytoy iti salun-at dagiti tarakenda.
Impetteng ti opisyal a posible a daytoy pay ti pagtaudan ti African Swine Fever ken dadduma pay a sakit ti ayup.
Gapu iti daytoy, naibalakad kadagiti hog raisers a gumatangda kadagiti lehitimo a feeds uray pay nangatngato bassit ti presyo daytoy nu idilig kadagiti adulterated feeds.
Mainaig iti daytoy, impaganetget ni Llanes a nasken nga agala wenno agrenew dagiti traders ti Transfer Permit iti opisina ti Department of Agriculture (DA)-Cordillera sakbay a mangiserrekda ti feeds ken livestock supply gaputa daytoy ti birukenda iti Animal Qurantine Checkpoint.
