![](https://img.bomboradyo.com/baguio/2020/01/divisoria.jpg)
BAGUIO CITY – Saan nga apektado ti panakaideliver dagiti natnateng manipud Benguet paturong iti Divisoria sadiay Manila iti plano ni Manila Mayor Isko Moreno a panakairikep ti Divisoria iti tallo nga aldaw para iti prusisyon ti Feast of Santo Niño a mangrugi inton Biyernes, January 17 agingga inton Dominggo, January 19.
Iti interview ti Bombo Radyo kenni Agot Balanoy, panakabagi ti liga dagiti asosasyon iti La Trinidad Vegetable Trading Post, kinunana a nakapatangen ni Benguet Governor Melchor Diclas ken dagiti trucker ti Benguet ti mayor ti Manila mainaig iti pakaseknan dagiti mannalon ken dagiti vegetable traders.
Dinakamatna nga adda ti waragawag dagiti buyers manipud Divisoria iti saan dagitoy a panaggatang pay iti nateng ditoy Benguet gapu iti 3-day closure ti nasao a merkado ti Manila.
Naituding a makipatang kuma ni La Trinidad Mayor Romeo Salda kenni Mayor Moreno ngem saan a natuloy gapu iti panagbaliw ti schedule ni Mayor Moreno.
Nupay kasta, nairana met nga adda ni Governor Diclas sadiay Manila isut gapuna a daytoyen ti nangkadwa kadagiti stakeholders ti vegetable industry ti Benguet a napan nakisarita kenni Mayor Moreno.
Kinuna ni Balanoy nga iti nasao a taripnong ket impasigurado ni Mayor Moreno kenni Governor Diclas a saan a naan-anay a mairikep ti Divisoria isut gapuna a makailako latta dagiti vegetable buyers.
Sigun kenkuana, no saan a gumatang iti nateng ti Benguet dagiti buyers ti Divisoria iti uneg ti tallo nga aldaw ket kaipapananna ti dakkel a pukaw wenno lugi kadagiti mannalon nangruna ita nga oversupply wenno adu ti suplay ti nateng kadagiti trading centers sadiay La Trinidad, Benguet.
Naamuan nga innaldaw a dumanon iti 700,000 kilos a highland vegetables ti ang-angkaten wenno gatgatangen dagiti buyers manipud Divisoria.
Kabayatan ti taripnong ti dua nga opisyal, nabukel ti special arrangements no sadino, mabalin latta a maidiskarga dagiti nateng iti partikular a paset ti Divisoria pakairamanan ti maaw-awagan a ‘looban’ wenno iti uneg a paset ti merkado gaputa saan met dagitoy nga apektado iti maisayangkat a prusisyon.
Impasigurado pay ni Mayor Moreno kenni Governor Diclas ti kinasagana dagiti 17 a public markets sadiay Manila a mangawat kadagiti nateng ken sabsabong manipud Benguet.