BAGUIO CITY – Nagduduma ti reaksion dagiti umili iti panakailukat ti siudad ti Baguio kadagiti turista manipud Luzon, pakairamanan ti Metro Manila manipud inton Oktubre 22.
Adu dagiti nangbabalaw iti nasao a banag gapu ta patienda nga amangan no karkaro nga agwaras ti COVID-19 ditoy siudad.
Ibilbilang met ti dadduma kas “anti-poor” ti pannakailukat ti siudad iti ad-adu a turista gapu ta mamati dagitoy a dagiti laeng nababaknang ti makabael nga sumarungkar ditoy siudad.
Babbalawen met ti dadduma ti pagalagadan a mangipawpawil iti panagdagus dagiti turista kadagiti kabagian dagitoy gapu ta masapul a kadagiti hotels ti pagdagusan dagitoy.
Maipalagip nga inrekomendar ti Baguio Tourism Council ken Hotel and Restaurant Association of Baguio ti pannakapalawa ti tourism program ti siudad.
Maibasar iti guidelines, saanen a masapul a ma-upload ti itinerary ken booking confirmation dagiti turista ken saanen a masapul ti pannakiballaet dagiti tour operators ken travel agents gapu ta mabalinen a dagiti turista a mismo ti agpa-book iti akomodasion iti hotels.
Maiparit ti panagdagus dagiti turista kadagiti kakabagianda ditoy siudad gapu ta masapul nga agdagusda kadagiti hotels.
Limitado laeng iti 200 a turista ti pasangbayen ti siudad iti tunggal aldaw ken masapul latta a maipasidong dagitoy iti COVID-19 test.
