Ag-epektibon inton Marso ti pannakaipangato ti minimun rate ti danum nga isupsuplay ti Baguio Water District wenno BAWADI.
Sigun kenni Engr. Salvador Royeca, General Manager ti Baguio Water District, maingato iti 30% ti rate ti danum ita a tawen.
Inlawlawag ni Engr. Royeca a ti panagbalbaliw ti babayadan iti danum ket adda iti pakainaiganna iti panagngato ti gastos dagitoy para iti pannakaipaay ti umno a serbisyo kadagiti konsumer.
Pakairamanan daytoy ti magastos para iti gasolina, kuryente, maintenance ken dadduma pay a napapateg a banag para iti agtultuloy a nasayaat a serbisyo nga ipaay dagitoy.
Mainaig iti dayta, innayon ti opisyal a ti BAWADI ket saan a ponpondoan ti gobyerno ken nakadependar laeng daytoy iti ibayad dagiti konsumer.
Nupay kasta, posible latta a bumaba ti rate ti danum nu bumaba met ti operating cost dagitoy.
