BAGUIO CITY – Imballaag ti mayor ti Baguio ti panangiparikepna kadagiti training centers ti Philippine National Police a masarakan ditoy siudad kasaruno ti panakailista ti maikadua nga outbreak ti COVID-19 iti maysa a campus ti Cordillera Administrative Region Training Center (CARTC).
Sigun kenni Mayor Benjamin Magalong, saannan nga ipalubos ti panakaisayangkat ti aniaman a panagsanay dagiti pulis a maangay ditoy siudad iti kanito a saan nga ipangag ti maseknan a training center ti panagtungpal iti minimum public health standards kontra iti COVID-19.
Kinunana nga iti laksid ti nagsaruno a serye ti outbreak ti coronavirus iti training center ket saanda paylaeng a nakabukel kadagiti napintas a wagas tapno maliklikan ti panagadu ti kaso ti COVID-19.
Innayonna nga agingga a saan a makabukel ti training center kadagiti masurot a paglintegan ken saanda nga agakari kenkuana ket saan pay a maituloy ti panagsanay dagiti pulis sadiay.
Maipalagip nga iti umuna nga outbreak iti CARTC ket 104 a pulis ti nakaptan ti COVID-19 bayat nga iti maikadua nga outbreak ket 26 a pulis ti nakaptan ti kapada a sakit.
