Nangiruwaren ti statement ti National Police Commission-Cordillera Administrative Region (NAPOLCOM-CAR) seknan iti napasamak nga insidente idiay Cordillera Administrative Region Training Center (CARTC) kalpasan a nangipatulod ti maysa nga indibidwal ti surat iti nasao nga opisina iti iti kaso ti maatap a panangrames ken kaadda ti korupsyon.
Sigun iti statement ti nasao nga opisina, bigibigenda ti surat nga inpatulod ti indibiduwal iti nagan a Greafin Bell Valdez-Olsim-Maranes-Dodon iti NAPOLCOM ken Department of the Interior and Local Government no sadino idagdagadagna dagiti nasao nga opisina nga aksyonanda ti maatap a kaso ti panangrames iti maysa a babae a trainee idiay Cordillera Administrative Region Training Center ken maatap a korapsyon iti uneg ti nasao a training center.
Nadakamat iti nasao nga statement a nangipatumpalen ti NAPOLCOM-Cordillera ti formal proceedings seknan iti nasao nga isyu.
Impetteng pay ti nasao nga opisina a saanda nga ayunan ti anyaman a parang ti sexual violence ken panangabuso iti otoridad .
Impakaammoda a naikatten iti posisyon dagiti indibidwal nga adda pakainaiganna iti nasao nga insidente ken pormal a maipila kadakuada ti administrative case a Grave Misconduct ken pananglabsing iti Philippine Training Institute Guidelines apaman a maadal amin dagiti ebidensya.
Impaganetget ti nasao nga opisina a maysa kadagiti tutokanda iti imbestigasyonda ket ti panaginom iti arak iti uneg ti training school ken ti allowance ken fees dagiti trainees.
Innayon pay daytoy a saanda a kanunongan ti anyaman nga aramid a mangdangran kadagiti trainees ken agtaltalinaed ti komitment dagitoy iti panangsigurado ti kinatalged iti uneg ti nasao a training center. //bombokaren.c.s
