BAGUIO CITY – Agtultuloy a maipatpatungpal ti ‘prioritization’ wenno panangipangruna kadagiti pasyente a maiturturong iti Baguio General Hospital and Medical Center (BGHMC) para iti admission.
Iti panaki-uman ti Bombo Radyo Baguio, inlawlawag ni Dr. Bernard Demot, Infectious Disease Specialist ti BGHMC nga ipampangrunada pay ita dagiti pasyente ti COVID-19 ken dagiti emergency cases.
Kinunana a daytoy ket tapno saan la unay a mapunno ti bed capacity ti pagagasan ken maisagana dagiti kagawaan iti kanito a mapasaran ti killaat a panagngato ti kaso ti COVID-19.
Naamuan a nanayonan dagiti maaramat a kagawaan ti pagagasan para kadagiti pasyente a makaptan ti COVID-19 kalpasan a temporaryo nga intantanda ti serbisyo nga ipapaay dagiti dadduma a departamento ti BGHMC kas iti panag-opera.
Impettengna a maipangruna dagiti pasyente manipod iti siudad ti Baguio, sarunuen dagiti pasyente iti probinsiya ti Benguet ken dadduma pay a lugar manipod iti rehiyon Cordillera.
Innayonna a dagiti laeng emergency cases ti ma-admit iti nasao a pagagasan.
Imbinglayna pay nga adun dagiti pagagasan sadiay La Union, Pangasinan ken dadduma pay a lugar iti ruar ti Cordillera nga agkidkiddaw a maiyakar iti BGHMC dagiti pasyente dagitoy.
Nupay kasta, dinakamatna a saan a mabalin nga akomodaren ti BGHMC dagitoy malaksid laeng no emergency case ti pasyente.
