![](https://img.bomboradyo.com/baguio/2019/08/puv-modernization.png)
BAGUIO CITY – Saan a tubtubngaren ti United Metro Baguio-Benguet Jeepney Drivers and Operators Association ti jeepney modernization program ti gobyerno ken ti panggep ti lokal a gobyerno ti Baguio a panakaiyakar dagiti staging area dagiti dadduma a parapasahero a jeep iti ruwar ti siudad.
Iti panakipatang ti Bombo Radyo kenni Pat Evangelista, presidente ti nasao a grupo, nasayaat dagiti nasao nga addang para iti panakarisut ti trapiko iti lokalidad.
Nupay kasta, impettengna a nasken met kuma a denggen dagiti maseknan nga opisyales iti DOTr ken Baguio LGU dagiti pakaseknan ti sektor dagiti drivers ken operators dagiti parapasahero a jeep iti lokalidad.
Dinakamatna a naidumduma ken natibker dagiti jeep a maar-aramat ita ditoy Cordillera.
Innayonna a saanen a kasapulan iti modernisasyon dagiti jeep gaputa mabalin a ti lokal a gobyerno ti mangrisut iti parikut iti trapiko ditoy siudad.
Inlawlawagna a babaen daytoy iti panakipatang dagiti maseknan nga opisina kadagiti drivers ken operators dagiti parapasahero a jeep tapnu mangipaayda met kadagiti singasing a mabalin a makatulong iti panakarisut ti parikut iti trapiko.
Inyunay-unay pay ni Evangelista a silulukat dagitoy iti panakapabaro dagiti parapasahero a jeep ngem nasken a karamanda iti panakabukel dagiti pagalagadan iti nasao nga addang.
Sigun kenkuana, kasapulan a karamanda iti panakabigbig dagiti pakaiyakaran dagiti staging areas dagiti parapasahero a jeep nga agtataud iti ruar ti Baguio nga agparparada iti masakupan ti siudad. (-with Bombo Nikki Agsiweng)