BAGUIO CITY – Puntirya ita ti Municipal Health Office ti Sagada, Mountain Province a mairaman kadagiti maipangruna a mabakunaan kontra iti COVID-19 dagiti tourism stakeholders ti munisipyo.
Sigun kenni Sagada Municipal Health Officer Dr. Novelyn Aborque, matuttutukan iti agdama a vaccination rollout sadiay dagiti adda paylaeng iti kategorya nga A1 wenno dagiti frontliners ken health workers ken kategorya nga A2 wenno dagiti senior citizens ken addaan ti co-morbidities.
Nupay kasta, kinunana a kagiddan iti mapangpanggep a panakaisubli ti operasyon ti turismo dagitoy ket nasken a mapapartak ti panakabakuna dagiti adda iti sektor ti turismo tapnu maipasigurado met ti kinatalged ti salun-at dagitoy.
Innayonna a nagsurat ti lokal a gobyerno ti Sagada iti Department of Health-Cordillera para iti panakaipaay ti kanayunan a suplay ti bakuna kadakuada.
Mangnamnama met daytoy a mapatgan ti nasao a kiddaw tapnu marugyan metten a maiwaras ti bakuna kontra iti COVID-19 kadagiti adda iti sektor ti turismo.
Mapattapatta a nasurok 2,000 nga indibidual ti stakeholders iti sektor ti turismo sadiay Sagada, Mountain Province.
