BAGUIO CITY – Inlawlawag ti Traffic Enforcement Unit ti Baguio City Police Office ti pannakaiyakar ti staging area dagiti jeep nga agbibiahe manipud Sablan, Benguet nga agturong ditoy siudad ti Baguio.
Sigun ken ni Police Major Oliver Panabang, dadaulo ti nasao nga istasion ti pulisya, manipud sadiay Kayang Street ket naiyakar sadiay Otek Street ti paradaan dagiti jeep ti Sablan.
Kinunana a paset daytoy ti Local Public Transport Route Plan ti technical working group ti transport committe ti siudad tapno maisimpa ti paradaan dagiti inter-municipal jeeps wenno dagiti parapubliko a jeep nga agtataud iti dadduma a munisipio.
Impettengna a masapul a maksayan dagiti jeep nga agparparada sadiay Kayang Street.
Kinunana pay a masapul nga awaten dagiti drivers ken operators dagiti panagbalbaliw nga isaysayangkat ti technical working group gaputa para daytoy iti pagsayaatan ti kaaduan.
