BAGUIO CITY – Nangrugin ti panakaisimpa ti traditional Christmas Tree iti deppaar ti Upper Session Road ditoy siudad ti Baguio.
Paset daytoy ti panagsagana ti lokal a gobyerno para iti tinawen a selebrasyon ti Christmas in Baguio ken ti baro a tawen.
Iti interview ti Bombo Radyo Baguio, kinuna ni City Tourism Operations Officer Engr. Aloysius Mapalo a maisayangkat latta ti tradisyonal a panakapasilaw ti Christmas Tree sadiay Upper Session Road inton December 1.
Mangrugi ti programa sadiay Malcom Square a pakapabuyaan ti nagduduma nga animations.
Imbinglayna a “The Parrol Story” ti tema ti Christmas in Baguio ita a tawen a pakaiparangan dagiti tradisyon ken kultura ti Cordilleras.
Inlawlawagna met a nalidem a maipatungpal ti lantern parade ita a tawen gapu kadagiti nagduduma a pakaseknan kas iti agtultuloy a panakaipawil ti panagu-urnong.
Kinuna pay ni Mapalo nga isagsaganada metten ti centralized countdown ti New Year a maipatungpal iti Melvin Jones Grandstand.
Dinakamatna a posible a maipalubos dagiti agturong sadiay nga agbuya gaputa open space daytoy.
Inyunay-unayna pay a mabuya babaen ti live-streaming dagiti nadakamat a programa tapnu makirambak latta dagiti umili uray sadino ti lugar nga ayan dagitoy.
