BAGUIO CITY – Namnamaen ti Department of Health (DOH) – Cordillera ti panakaipasidong manen ti rehiyon Cordillera iti Modified General Community Quarantine (MGCQ) inton sumaruno a bulan ti Marso.
Sigun kenni DOH-Cordillera Regional Director Dr. Ruby Constantino, adda itan iti moderate risk level ti rehiyon iti baet a maibilbilang latta a high risk level ti Kalinga.
Kinunana a ti epidemic risk level ti maysa a rehiyon ti pagbasbasaran ti DOH iti agbalin a quarantine status daytoy.
Innayonna nga iti kanito a suruten ti Central Office ti DOH ti nasao nga indicator ket manamnama a maipasidongen ti Cordillera iti Modified GCQ.
Impettengna nga awan ti pagdanagan dagiti umili no maipasidongen ti rehiyon iti MGCQ gaputa mabaelan dagiti nagduduma nga LGUs a maimaton dagiti kaso dagitoy iti COVID-19.
Iti agdama, adda ti Cordillera iti sidong ti General Community Quarantine nga agpaso inton tapos, Pebrero 28.
