BAGUIO CITY – Makaaw-awat ita iti nagduduma a komento a kaaduanna ket negatibo a reaksion ti panakaisubli ti implementasyon ti sigud a number coding scheme kadagiti taxi units nga agbibiahe ditoy Baguio City.
Maipalagip a nagleppasen ti odd-even scheme a nasursurot manipud nangrugi ti pandemya no sadino, iti number coding scheme ket mapalubusan nga agbiahe amin a taxi iti Sabado ken Dominggo bayat a saanda laeng nga agbiahe iti aldaw a coding dagitoy.
Iti panakiuman ti Bombo Radyo Baguio kadagiti sumagmamano a taxi drivers a makimanmaneho laeng, kinunada a dakkel a parigat kadakuada ti panakaisubli ti number coding scheme.
Kinunada a daytoy ket gaputa awan ti mabingayda gaputa bassit dagiti mailugluganda a pasahero nangruna ta awan dagiti sigud a pasaheroda a kas kadagiti estudyante, dagiti nag-aliwaksay iti rabii ken dagiti turista a saan a nagitugot ti lugan.
Impettengda a napimpintas latta ti odd-even scheme gaputa adda latta ti maiyaw-awid dagitoy para iti pamilyada malaksid a mabayadanda ti boundary dagitoy a dumanon iti P1,500.
Innayonda a malaksid iti number coding scheme ken nangina a krudo ket parikutda ti panag-adu ti bilang dagitoy nga agbibiahe kalpasan a napalubusan ti panagbiahe ti kanayonan a 200 nga yunit ti taxi ditoy siudad.
Babaen met iti social media page ti Bombo Radyo Baguio ket impeksa dagiti taxi drivers a netizens ti riknada no sadino, kinunada a ti parikut iti trapiko ti rumbeng nga ipangruna a solosyonan dagiti otoridad tapnu saan a masinga ti panagbiahe dagiti taxi ken nalakada a makasubli tapnu awan dagiti maur-urnong a pasahero.
Impettengda a nasken a nakonsulta dagiti taxi drivers ken operators sakbay a naisubli ti number coding scheme.
Inyapelada pay ti panangipangag ti technical working group ti Traffic Enforcement Unit ti Baguio City Police Office kadagiti arungaing dagiti taxi drivers nangruna dagiti makimanmaneho laeng.
