BAGUIO CITY – Nalidem a maitantan ti naituding a May 9, 2022 National and Local Elections (NLEs) ti pagilian.
Reaksion daytoy ni Baguio City Election Officer Atty. John Paul Martin iti panakiyuman ti Bombo Radyo Baguio mainaig iti maibagbaga a saan a panakaituloy ti masungad a basingkawel gapu iti mapaspasaran a pandemya gapu iti COVID-19.
Kinunana a nupay a balido a rason ti pandemya iti posibilidad ti saan a panakaangay ti eleksion ket nasken met a dumalan ti panggep iti atiddog ken ado a proseso.
Dinakamatna nga iti konstitusyon ti pagilian ket saan a mabalin nga itantan ti Commission on Elections (COMELEC) ti nasyonal ken lokal nga eleksion manipud iti naituding nga aldaw a pakaipatungpalan dagitoy malaksid laeng no adda ti panag-amyendar iti konstitusyon nga aramiden ti Kongreso.
Inyunay-unayna a naiduma ti NLEs iti barangay election gaputa ti barangay election ket saksakupen ti maysa laeng a linteg a nalaka a maamyendaran no pagkasapulan ti panakaitantan daytoy.
Innayon ni Atty. Martin a nasken metlaeng nga adalen ti Kongreso ken ti COMELEC ti singasing a maipatungpal iti dua agingga tallo nga aldaw ti eleksion ita a pandemya.
Nupay kasta, inaklonna a mabalin a pagtaudan ti dakdakkel nga alegasyon iti panagpardaya dagiti pulitiko ti nailaylayon a panakaipatungpal ti masungad nga eleksion.
