BAGUIO CITY – Intuloy ti provincial government ti Benguet babaen iti Provincial Veterinary Office ti panakaiwaras ti burias kadagiti napili a benipisaryo.
Sigun kenni Provincial Veterinarian Dr. Merriam Tiongan, saan pay a nakompleto ti panakaipaay ti baboy kadagiti napili a hog raisers.
Indaulon da Dr. Tiongan ken Governor Melchor Diclas ti panakaiwaras dagiti 14 a babai a burias pakairaman ti feeds iti maikadua a batch dagiti benipisaryo.
Immunan a naiwaras dagiti 21 a burias kadagiti umuna a batch ti benipisaryo idi laeng Hulyo 21.
Inlawlawag ni Dr. Tiongan a dagiti naiwarasan ti libre a baboy ket kadagiti lugar nga awanan kaso ti African Swine Fever (ASF) ken napili dagiti benipisaryo kabayatan ti naisayangkat nga inspeksyon ken assessment.
Impasiguradona a sakbay a naiwaras dagiti burias ket naipasidong pay dagitoy iti lab test, no sadino, negatiboda iti ASF virus.
Maipalagip a nangilatang ti provincial LGU ti Benguet iti pondo para iti swine repopulation program iti panggep a mapangato ti hog production tapno masolusyon ti agkurkurang a suplay ti baboy ken ti nangato a presyo daytoy gapu iti ASF outbreak iti pagilian.
