BAGUIO CITY – Inyunay-unay ti City Engineering Office (CEO) ti lokal a goyerno ti Baguio a positibo ti nagbalin a resulta ti panakaiyakar dagiti sumagmamano nga staging areas dagiti parapasahero a jeep iti ruar ti Central Business District (CBD) ti siudad.
Iti interview ti Bombo Radyo Baguio kenni Engr. Juanario Borillo, dadaulo ti Traffic and Transportation Management Committee ti CEO, kinunana a nagbalin a naannayas ti gunay ti trapiko iti lokalidad nangruna iti paset ti kalsada a naikkatan dagiti staging areas.
Sigun kenkuana, nagbalin a pagnaan dagiti tao dagiti nabakantean nga staging areas.
Inlawlawagna manen a ti nasao a relokasyon dagiti staging areas dagiti parabubliko a jeep iti CBD ket paset ti inisyatibo ti lokal a gobyerno ti Baguio tapnu marisot ti parikut iti taray ti trapiko ditoy siudad.
Innayonna a babaen pay iti daytoy ket marisut ti parikot iti kinakurang ti espasyo kadagiti terminal babaen iti nasao nga addang.
Nupay kasta, kinuwestionaran ti City Coucil ti Baguio ti imparang ti CEO a resulta ti panagadalda seknan iti temporaryo a relocation sites dagiti terminal dagiti sumagmamano a parapasahero a jeep iti ruar ti CBD.
Kinarit pay ni Councilor Michael Lawana ti CEO iti panangipatungpalda iti nasao a plano iti kanito nga agsubli ti siudad iti normal a sitwasyon.
Sigun kenkuana, babaen iti daytoy ket marukod ti kina-epektibo ti plano iti panakarisut ti parikut iti trapiko ditoy lokalidad.
Impetteng met ni Councilor Lourdes Tabanda ti pagkasapulan iti panangikonsidera ti CEO iti distansiya a pagnaen dagiti pasahero manipud iti CBD paturong iti kabarbaro nga staging area ti paglugananda a parapasahero a jeep. (report ni Bombo Brigitte Marcasi)
