BAGUIO CITY – Agtultuloy ti panangpili ti lokal a gobyerno ti Tublay, Benguet kadagiti mabalin pay a mailukat sadiay kas kanayonan a tourist sites para kadagiti umili.
Imbinglay daytoy ni Tublay Mayor Armado Lauro kagiddan ti panangilukatda manen iti umili kadagiti sumagmamano ken kabarbaro a tourist sites iti masakupan ti ili idi napalabas a December 24, 2020 agingga January 6 ita a tawen.
Inlawlawagna a nailukat dagiti nasao a disso kalpasan a naobserbaranda a kasapulanen dagiti umili sadiay ti panagaliwaksay kabayatan ti holiday season ken makatulong kadagiti tourist guide a napukawan ti trabaho nga intunda ti pandemya.
Eksklusibo nga inlukat ti lokal a gobyerno ti Tublay para kadagiti local tourists ti Ahonda Caves, Asin Hot Spring, rock formations, jungle adventure, balete tree, The Ridge Cafe ken ti Polig’s Berry Farm.
Nupay kasta, nainget a maipatpatungpal dagiti minimum health standards kontra iti COVID-19.
Mangnamnama pay ni Mayor Lauro a mailaylayon ti panakailukat dagiti nasao a disso la ketdi agtalinaed ti modified general community quarantine nga estado ti Benguet.
