BAGUIO CITY – Inimbitaran ti lokal a konseho ti Baguio dagiti opsiyales ti MOLDEX Corporation tapnu pagpalawagen dagitoy iti panangpukanda ti 49 a pine trees para iti konstruksion ti dakkel a condominium ti kompanya sadiay Marcos Highway.
Inimbitaran pay ti konseho iti sesyonda inton Lunes dagiti panakabagi ti Department of Environment and Natural Resources, City Environment Parks and Management Office ken daduma pay a maseknan nga ahensya.
Sigun iti konseho, rumbeng nga agpalawag dagiti opisyales dagiti nasao nga ahensia no kasano a nakaala iti kaskenan a cutting permit ti nasao a kompanya a nangitunda iti panakapukan ti 49 a kayo iti uneg ti sumagmamano nga oras.
Ammuen pay dagiti opisyales ti siudad no anya dagiti proseso a rumbeng a masurot iti panakaipaay ti permit iti biyang dagiti ahensya ti gobyerno ken no kasano a nasurot ti umno a proseso iti panakaipaay ti permit kadagiti agimatmaton iti condo.
Immunan a nagaramid iti petisyon dagiti sumagmamanno a residente ti siudad iti panangidaulo ti environmentalist a ni Dr. Michael Bengwayan a mangkidkiddaw iti panangibilin ni Presdiente Rodrigo Duterte iti panangisardeng ti property developer a MOLDEX Corporation iti nasao a proyekto gapu iti panakapukan dagiti ado a kayo.
Kinuna ni Bengwayan a dagiti dadakkel a pine trees nga 70 agingga 80 years old ket agserserbi a heritage trees ti Baguio ken no awanen dagitoy ket saanen a maawagan ti siudad kas City of Pines.
Puntirya ti grupo a makaala iti 2,500 a pirma manipud kadagiti umili ti siudad para iti panakaipursigi ti nasao a petisyon.
