BAGUIO CITY -Simple ngem naisangsangayan latta ti maangay a panakarambak ti La Trinidad, Benguet iti Strawberry Festival ita nga bulan.
Iti interview ti Bombo Radyo Baguio kenni Municipal Tourism Officer Valred Olsim, kinunana a sumagmamano wenno limitado laeng ti ipatungpalda nga aktibidad kas maibasar iti inaprubaran ti Municipal Inter-agency Task Force ti La Trinidad.
Sigun kenkuana awan ti maipatungpal a parada kasta met ti giant strawberry cake gaputa P250-K laeng ti pondo ti nasao nga pestibidad ita nga tawen nu idilig iti sigud wenno milyones a pondo dagitoy kadagiti naglabas a panawen.
Mailukat met ti Strawberry Festival intun Marso 11 nu sadinno awan ti maangay nga parada ken limitado laeng kadagiti opisyales ti La Trinidad ken sumagmamano a delegasyon ti mapalubosan iti ipatungpalda a programa.
Saan pay a maiyawis iti publiko ti highlight ti pestibidad intun Marso 18 ken limitado metlaeng dagiti makipaset ngem maipatungpal ti ritwal a panagparti ti baboy.
Irekrekomendarda iti publiko ti panagbuyada laengen iti live broadcast ti opening ken ti highlight ti pestibidad bayat nga nakalukat met kadagitoy ti maangay nga Strawberry Lane a mailukat intun Marso 14 agingga 27.
Karaman pay kadagiti aktibidad a maipatungpal ti Roadside General Cleaning; Tree Caring Activity;Strawberry Cake Competition; Balili River Clean Up ken dadduma pay.
Inlawlawag pay ni Olsim a paset ti panagridam iti panag-uurnong ti publiko ti saanda a panakaipatungpal kadagiti parada malaksid pay a maar-aramat iti COVID-19 response dagiti municipal gym ken dadduma nga facilities nga ar-aramatenda iti panakarambak ti pestibidad.
Kabayattan, impasigurado ti La Trinidad, Municipal Police Station ti nainget a panagwanawanda kadagiti parapubliko a lugar iti munisipyo kagiddan ti napalukayan nga restrictions ken ti panakaipatungpal ti Strawberry Festival.
Iti interview ti Bombo Radyo Baguio kenni PLT. Anthony Cong-O, dadaulo ti La Trinidad Municipal Police Station, imbinglayna nga adda dagiti plano dagitoy a nakasagana iti panagwanawanda iti munispyo.
Maipatungpal ti kanayunan nga deployment ken security plan iti panakarambak ti Strawberry Festival malaksid kadagiti maipatpatungpal nga traffic management plan ken dadduma pay a programa tapnu maliklikan ti panakailista dagiti krimen.
Kinunana a nakasagana dagitoy iti manamnama a kanayunan nga bilang dagiti agturong sadiay nangruna iti panakapalukay dagiti restrictions ken panakarambak ti pestibidad.
Kangrunaan nga imballakadan ti panagridam ken panag-alerto ti publiko kontra kadagiti agtatakaw wenno mannibrong a maysa kadagiti nainget a sipsipotanda sadiay.
