BAGUIO CITY- Impanamnama ti Department of Education (DepEd)-Cordillera a kitaen ken sukimaten pay dagitoy dagiti learning materials sakbay a maiwaras kadagiti pagadalan iti umay nga school year.
Babaen iti daytoy ket maipasigurado nga awan ti naikabil a biddot nga impormasyon a mangiladladawan kadagiti Igorot wenno kadagiti nainsigudan nga umili iti Cordillera.
Sigun kenni DepEd-CAR Regional Director Estella Carino, nasken a dagiti maikabil nga impormasyon kadagiti learning materials ket dagiti umno a galad ken langa dagiti Igorots tapno makorektar ken maisardeng ti biddot a pannakaamo dagiti daduma a tao.
Maipalagip nga idi napan a tawen ket nagviral dagiti sumagmamano a printed modules gapu iti biddot ken negatibo a pannakailadawan dagiti Igorot.
Karaman ditoy ti saan a nasayaat ken saan nga umno a panakailadawan ti pisikal a langa ken panagbadbado dagiti Igorot.
Gapu iti daytoy, ado a Cordilleran ti nadismaya ken immapela iti pannakakorektar dagiti nasao a learning materials.
Impila metten dagiti Cordillera lawmakers idi napan a tawen ti House Resolution No. 1552 a nangkonkondenar iti panakaibaba ti saad dagiti nainsigudan nga umili iti rehiyon.
Impetteng met ni sigud a DepEd Secretary Leonor Briones a napatawanen ti kaskenan a pannusa dagiti indibidual a responsable iti nasao nga isyu.
