BAGUIO CITY – Al-allukoyen ti Philippine Red Cross (PRC) dagiti naayat nga agidonar iti dara nga agturongda laeng iti People’s Park, Malcolm Squre, Baguio City inton Sabado para iti Dugong Bombo 2017 a blood letting activity ti Bombo Radyo ken Star FM iti panakibinnadang ti PRC.
Segun iti donor recruitment officer ti PRC Baguio, napateg ti panagidonar iti dara gaputa babaen iti daytoy ket masilpoan ti biag ti maysa a tao nga agkasapulan iti dara.
Inlawlawagna met a dumalan iti pre-screening dagiti agdonar ken nu naurnos ti amin ket mabalinen nga agdonar dagitoy.
Impalagipna met a dagiti mabalin nga agdonar ket agtawen iti sangapulo ket walo agpangato bayat a dagiti agtawen iti sangapulo ket pito agpapaba a kayatna ti agdonar ket kasapulan ti ‘written consent’ manipud kadagiti nagannak dagitoy.
Innayunna a nasken met laeng nga addaanda iti timbang a limapulo a kgs agpangato.
Impalagipna pay a sakbay nga agidonar iti dara ket nasken a nakaturog iti innem agingga iti walo nga oras, saan a nakainom iti arak, saan a nagsigarilyo, agipauneg iti uray light meal, ken aginom iti adu a danum.
