Pinirmaanen ni Louisiana Governor Jeff Landry idi laeng kalman ti gakat a mangikagumaan a maipakita ti Ten Commandment iti amin a parapubliko a pagadalan idiay Louisiana, U.S.A.
Gapu iti dayta, impablaak ti American Civil Liberties Union a dagos a mapilaan ti kaso dagiti manglapped iti linteg nu sadinno, kinunada a panaglabsing daytoy iti “constitutional separation” ti simbaan ken estado kas maibasar iti pangngeddeng ti Korte Suprema ti Estados Unidos.
Pinirmaan daytoy ni Landry tapno mapalawa pay ti pammati dagiti indibidual kadagiti parapubliko a pagadalan.
Sigun kenni Landry, ti panagrespeto iti turay ti linteg ket babaen iti orihinal a nangipaay ti linteg a ni Moises.
Karaman kadagiti dadduma nga addang nga imbilin ti opisial ket ti panangawat ti “chaplains” iti pagadalan, panaglapped kadagiti manursuro a mangdakamat iti “sexual orientation” wenno “gender identity”, panaglapped kadagiti pagadalan a mangisar iti kayatda a nagan (“student’s preferred name”) malaksid a maikkanda ti pammalubos manipod kadagiti nagannakda.
Maipalagip nga imparit ti First Amendment of the U.S. Constitution ti gobierno iti panagipasdek ti narelihisoan a banag ken idi 1980, kinuna ti U.S. Supreme Court a saan a nainkalintegan ti pangipakita ti Ten Commandments iti pagadalan.
