Personal a bimmisita ni President Ferdinand Marcos idiay General Santos City tapno aginspek kadagiti nadadael nga imprastraktura ken idauloanna dagiti relief operations.
Bayat iti panagbisitana, inyanunsyo ti presidente a mangipaay ti gobyerno ti ₱50,000 nga ayuda tunggal pamilya a naawanan iti ay-ayatenda iti biyag gapu iti napasamak a gingined.
Kigiddan dayta, nangipaay metlaeng ti Department of Labor and Employment (DOLE) iti agingga P15,000 a tulong-pinansyal para kadagiti mangmangged a naapektaran iti nasao a gingined. Posible pay a makaawat ti sag-P30,000 funeral assistance dagiti pamilya dagitoy.
Kabayatanna, agarup 1,100 a pagadalan idiay Mindanao ti naapektaran iti napasamak bayat a suspendido pay laeng ti klase ti agarup 8,000 a pagadalan.
Sigun iti Department of Education, posible a dumanon pay iti mano a bulan sakbay a maisubli iti normal dagiti operasyon ti sumagmamano a pagadalan.
Kagiddan dayta, impeksa dagiti nagduduma nga ahensya ti gobyerno a marigatanda basit iti panangitulod iti tulong kadagiti sumagmamano a lugar gapu paylaeng kadagiti nadadael a kalkalsada.
Gapu iti dayta, kinasapulan a nagaramat ti Armed Forces of the Philippines kadagiti helicopter tapno maitulod dagiti taraon, agas, ken dadduma pay a kangrunaan a kasapulan kadagiti komunidad a saan nalaka a madanon.
Impakaaammo met ni President Ferdinand Marcos, Jr. , a naisublin ti kuryente iti kaaduan a paset ti apektado a luglugar kasta metten ti komunikasyon, ken suplay ti danum kadagiti nagduduma a komunidad.
Agtultuloy met ti panagtitinulong dagiti nagduduma nga ahensya ti gobyerno tapno dagos a maipaay ti relief, rescue, ken rehabilitation efforts kadagiti rinibribo nga apektado a pappamilya idiay Mindanao. //bombokaren.c.sapirao
