IFUGAO PROVINCE – Matumal ti panangipila iti Certificate of Candidacy idiay Banaue, Ifugao para iti 2025 midterm elections.
Iti interview ti Bombo Radyo kenni Raul Dulappe, Election Officer ti Banaue, sangapulo ket tallo laeng a Certificate of Candidacy ti naawatda idi kalman, Oktubre 7.
Sigun kenkuana, maysa ti nangipila iti kandidatura-na para iti kina-bise Mayor, ken sangapulo ket dua ti agngayangay a nangipila iti kandidatura-na para iti kina-councilor.
Sumagmamano laeng kadagiti karit a nasango-da ket ti blanko nga impormasyon kadagiti forms dagitoy.
Innayona a kadawyan a mapaspasamak ti last minute sadiay kas metlaeng iti napasaranda iti voter registration idi Setyembre 30.
Kabayatanna, namnamaenda nga adu ti bilang dagiti agngayangay ti agturong iti opisina dagitoy para iti Certificate of Candidacy-na ita a maudi nga aldaw ti filing.
Iti sabali a bangir, kinuna ni Dulappe a natalna ti municipyo sadiay gapu ta awan ti pakasaritaan iti election related violence.
Malaksid iti dayta, agarup 8,000 a botante ti nagparehistro manipud Pebrero agingga idi Setyembre.
Kinunana a bassit laeng ti ngimmatoan dagiti umili a nagparehistro iti agdama
gapu ta bassit ti nag-avail kadagiti naipatpatungpal a satellite registration.
Sigun kenkuana, kinakurang iti interes dagiti residente ti makitkita a rason a bassit laeng ti nagparehistro nu sadino saanda a kayat a makipaset iti politika gapu ta saanda a kayat nga agparehistro ken mangipila iti Certificate of Candidacy.
Nupay kasta, kinuna ni Dulappe a napintas ti politika sadiay gapu ta agpapagayam dagiti agngayangay.
Iti agdama, pakabuklan a 15,161 ti registered a botante idiay Banaue, Ifugao.
