BAGUIO CITY – Balballaagan ti lokal a gobyerno ti La Trinidad, Benguet ti land developer sadiay Upper Cogcoga iti Barangay Pico para iti panangisardengda ti development sadiay partikular ti panakaimuntar ti gate iti pasang-at a kalsada.
Sigun kenni Mayor Romeo Salda, naklaatda idi addan ti iron gate a naimuntar iti pasang-at a kalsada paturong iti Upper Cogcoga.
Dinakamatna a rinakrakda dagiti hollow blocks nga immuna nga inyalad ti land developer iti nasao a kalsada gaputa saksakupen daytoy ti road-right of way.
Impettengna a nasken nga urayen ti land developer ti desisyon ti korte iti environmental case a naipila kadakuada sakbayda nga agaramid ti aniaman a development wenno patrabaho.
Sigun kenkuana, mitigating measures laeng ti mabalin nga aramiden ti developer bayat a nakapila paylaeng ti kaso iti korte.
Imbinglayna nga ur-urayenda ita ti sertipikasyon manipud Department of Public Works and Highways a mangpaneknek a ti nakaiyaramidan ti alad ket paset ti road-right of way.
Innayonna a rakrakenda manen ti baro nga alad apaman nga adda ti pammalubos manipud iti korte.
