Puntiria ti Department of Social Welfare and Development (DSWD) ti panangiwaras ti pinansial a tulong kadagiti benepisiario iti sidong ti Pantawid Pamilyang Pilipino Program (4Ps) ti gobierno inton 2025.
Sigun kenni DSWD Assistant Secretary JC Marquez, prayoridadda ita a tawen ti panangpasayaay ti singasing tapno maipangato ti gatad a maiwaras para kadagiti benepisiario ti Pantawid Pamilyang Pilipino Program (4Ps).
Daytoy ket iti pannakikoordinarda iti National Economic and Development Authority (NEDA), Philippine Statistics Authority (PSA), ken Philippine Institute for Development Studies (PIDS).
Immuna a kinuna ti nasao nga ahensia a maikonsidera ti epekto ti inflation iti panggep a panagpangato ti pinansial a tulong para kadagiti benipisiario ti nasao a programa.
Inlawlawag ni Marquez a nakabasar iti panagtalantan dagiti maseknan nga ahensia ken organisasion ti panagbaliw ti gatad.
Kabayatanna, ti gamin presion dagiti kangrunaan a gagatangen ken serbisio iti Pilipinas ket ngimmato ti maika-uppat a gundaway iti bulan ti Mayo, nu sadinno naikeddeng ti 3.9%, sigun iti PSA.
Iti agdama, dumanon iti 4.4 a babbalay iti pagilian ti aktibo a miembro ti gobierno para iti conditional cash transfer program.
