ABRA PROVINCE – Agtultuloy ti maipatpatungpal nga operasyon dagiti kameng ti otoridad para iti panakatiliw dagiti miyembro ti rebelde a grupo a mangkikikil kadagiti residente partikular iti nasulinek a sitio ken babarangay sadiay Abra.
Iti panakiuman ti Bombo Radyo kenni Major Rigor Pamittan, dadaulo ti 5th Infantry Division ti Philippine Army, agturturong dagiti rebelde kadagiti sitio tapno mangkikil wenno agdawat dagitoy ti taraon nga aramatenda bayat ti panaglemmeng ken panagkontra-da iti gobyerno.
Kabayatanna, kinumpirmar ni Pamittan nga awan ti nadangran bayat ti napasamak nga engkwentro iti baet ti 50th Batallion ti Philippine Army ken dagiti nabatbati pay a miembro ti Komiteng Larangang Guerilla North Abra iti paset ti Naguilian, Sallapadan, Abra itay laeng kallabes.
Nagpakdaar metten ti Sallapadan Local Government Unit kadagiti residente a liklikan paylaeng dagitoy ti panagturong kadagiti adayo a lugar ken nasaysayaat nu agtalinaed kadagiti pagtaenganda bayat a maipatpatungpal ti nainget nga hot pursuit operation.
Iti sabali a bangir, dinakamat ni Pamittan nga agtultuloy ti panangipatpatungpal dagitoy iti information drive kadagiti pagadalan iti nasao probinsya tapno malawlawagan dagiti agtutubo ken maliklikan ti panakaguyugoy dagitoy a makipaset kadagiti nasao a klase ti grupo.//Bombo Rob Dominguez
