Linagip dagiti marine scientist iti University of the Philippines ti panangriribuk ti China kadagitoy bayat ti kaudian a “marine scientific survey” nga impatungpalda iti Sabina Shoal wenno pagaamo metlaeng nga Escoda Shoal idiay West Philippine Sea.
Imbinglay ni Fernando Siringan, Doctor of Philosophy iti UP Marine Science Institute, a nagdanagda kalpasan a pinadas dagiti Chinese Coast Guard nga umasideg iti nasao a baybay.
Kinuna met ni UP Institute of Biology’s Jonathan Anticamara a kurang ti bilang iti Philippine Coast Guard (PCG) nu idilig iti bilang dagiti Chinese Coast Guard bayat ti kaudian a panagsango dagitoy itay laeng nabiit.
Nupay man limitado a nakaala ti “resources”, imbinglay dagiti UP scientists a ti resulta ti marine scientific survey ket maiparparangarang a dagiti corals ket dandani siento por siento a natay dagitoy.
Maibasar iti obserbasion dagitoy, maatap a nangipatungpal ti China iti “acoustic survey” iti nasao a baybay.
Kabayatanna, kinuna ti Philippine Coast Guard a daytoy ti umuna a gundaway a nadokumento ti Pilipinas ti China a mangideploy iti hovercraft iti uneg ti exclusive economic zone (EEZ) ti pagilian.
Sigun kenni PCG spokesperson for WPS Commodore Jay Tarriela, saan a naipalubos iti China a mangipatungpal ti amphibious drill iti uneg ti exclusive economic zone ti Pilipinas.
