BAGUIO CITY- Posible a maikalikagum manen ti medical clearance ken health declaration kadagiti indibidual a sumrek iti La Trinidad, Benguet kasaruno ti waragawag a maipasidong ti rehiyon Cordillera iti General Community Quarantine mangrugi inton Abril.
Inwaragawag daytoy ni Mayor Romeo Salda iti interview ti bombo radyo baguio kagiddan ti panangkunana a babaen iti pannakaipasidong ti rehiyon iti GCQ ket malapdan ti agtultuloy a panagngato ti kaso ti COVID-19.
Kinunana a dumanonen iti 2,058 ti pakabuklan a bilang ti kaso ti COVID-19 iti municipyo dagitoy kalpasan a nailista manen ti baro a kaso idi kalman.
Nupay kasta, dinakamatna a kaadoan a nagpositibo iti COVID-19 ket dagiti agtratrabaho laeng sadiay La Trinidad ken saan a residente dagitoy.
Impetteng pay ni Mayor salda nga addu ti nagturong iti municipyo dagitoy kalpasan a napalukayan ti travel restrictions a rason ti agtultuloy a panagngato ti kaso ti COVID-19 sadiay.
