Maad-adal itan ti possible a pannakaimuntar ti mini sewage treatment plant wenno pre-treatment facility iti Maharlika Livelihood Complex Center iti siudad ti Baguio sakbay nga aglupyas ti sewer line daytoy.
Iti pannakiuman ti Bombo Radyo kenni Atty. Rhenan Diwas, dadaulo ti City Environment and Parks Management Office-Baguio, kinunana a napated ti pannakapapintas ti nasao a complex center gapu iti adu a parikut kas iti sewer a kanayon dagitoy a tarimaanen.
Inlawlawagna pay a saanen a kabaelan ti kapasidad ti sewer ti kinaadu metlaeng dagiti stalls ken tenants nga agar-aramat iti daytoy.
Gapu iti dayta, inyunay-unayna a nasken a matarimaan daytoy para iti pagsayaatan ti publiko.
Kabayatanna, impeksa met ni Daryll Kim Longid, dadaulo ti Public Order & Safety Division a maibasar iti monitoring dagitoy ket tunggal aldaw nga adda ti parikut maipapan iti sewers nga agluplupyas.
Iti pannakiuman ti Bombo Radyo kenkuana, dagiti nasao a sewer ket idi paylaeng 1960’s wenno 1970’s a naaramid daytoy rason a dagiti naidesenyo a sewer ket para laeng iti bassit a siudad.
Nupay kasta, gapu iti kinaadu dagiti umili iti siudad ket saanen a kabaelan ti kapasidad ti sewer lines.
Imbinglay met nga adda ti singasing idi 2019 manipud iti maysa a private company a mangtariman ti sibubukel a sewer iti siudad tapno maakomodar amin ngem saan daytoy paylaeng a naaprobaran gaputa agkasapulan daytoy iti dakkel a pundo.//Bombo Noveh Organo
