BAGUIO CITY – Tarigagay ni Benguet Cong. Eric Go Yap a maipaayan iti binulan a cash aid a P1,000.00 dagiti nakukurapay a persons with disabilities (PWDs).
Impila ti Cong Yap ti House Bill No. 1754 tapno makaipaay iti kanayunan nga ayuda kadagiti indigent pwd’s kagiddan iti agtultuloy a panagngato dagiti kangrunaan a gagatangen.
Nakalanad iti naisingasing a gakat a sakbay a maikkan iti binulan nga allowance ket rumbeng a makaala iti sertipikasyon dagiti marigrigat a pwd’s manipud iti Department of Social Welfare and Development (DSWD) ken National Council on Disability Affairs (NCDA).
Sigun iti manmanday linteg, kasapulan nga agtignay ti gobierno tapno makatulong iti panagbiag dagiti pwd’s aglalo ita a mapaspasaranan ti agtultuloy a panagngato dagiti kangrunaan a gagatangen.
Karaman iti probisyon ti maisaksakad a linteg a mapatawan ti pannusa dagiti PWD a maduktalan a saan a nakurapay nu sadino mapatawan dagitoy iti pannusa wenno multa a dumanon iti P50,000 agingga P200,000.
Karaman nga author iti HB 1754 ket da ACT CIS Cong. Edvic Yap, Cong. Jocelyn Tulfo, Cong. Ralph Tulfo ken Cong. Jeffrey Soriano.
