Baguio City- Maplanplano ita ti pannakaipasdek dagiti baro a World War II markers ditoy Baguio City kagiddan ti panaglagip ti maika walo pulo a tawen ti panagsuko ti Japanese Imperial Army ditoy suidad.
Ti maaramat a budget a dumanon iti P600,000.00 ket manipud iti naor-or a pundo iti balligi a pannakaipatungpal iti Victory Golf Cup nga inorganisa ti Philippine Veterans Bank a naisayangkat idiay Camp John Hay Golf Course.
Sigun kenni Mike Villa-Real, first vice president for marketing and communications ti nasao a banko, kasapulan a matarimaan dagiti agdama a markers kas panaglagip kadagiti pagteng a napasamak ditoy Baguio City idi Maikadua a Gubat Sangalubongan.
Babaen iti nasaoa golf tournament ket naminsan manen a nalagip dagiti kinabanuar dagiti soldado ken beterano para iti panagwaywayas ti Pilipinas.
Pinagyaman pay ni Villa-Real dagiti local ken foreign golfers a dumanon iti nasurok limapulo a nangipaay iti suporta iti nasao a pasalip uray saan a napintas ti kasasaad ti paniempo.
Tunggal tawen ket kabinnadang ti Veterans Bank ti Baguio City Government para kadagiti nagduduma a programa ken proyekto tapno lagipin ti naisangsangayan a pasamak iti pakasaritaan iti pagilyan nu sadino ti World War II ket nagrugi ken naggibos ditoy City of Pines. //Bombo Jordan Tablac
